वीरगञ्ज,
जिल्ला प्रशासन कार्यालय पर्साले वीरगञ्ज महानगरपालिकाका केही ठाउँमा सोमबार बेलुकी ५ बजेदेखि कर्फ्यू लगाएको छ ।
पूर्वमा बाराको सिमाना जोडिएको नगवा चौक, पश्चिममा तिलावे पुल, उत्तरमा परवानीपुर र दक्षिणमा मितेरी पुल भन्सारसम्मको क्षेत्रमा अनिश्चितकालका लागि कर्फ्यू लगाएको हो ।
फागुन ३ गते रौतहटको ईशनाथ नगरपालिका मोतिपूरमा भएको विवादलाई लिएर वीरगञ्जमा तनाव उत्पन्न भएपछि कर्फ्यू लगाएको प्रशासनले जनाएको छ ।
रौतहट घटनाको विरोधमा वीरगञ्जमा आयोजित प्रदर्शनका क्रममा विवाद र झडपको स्थिति उत्पन्न भएको थियो । सर्वसाधारणको सुरक्षामा पर्न सक्ने जोखिम र शान्ति भंग हुन सक्ने स्थिति देखिएकोले कर्फ्यू आदेश जारी गर्नु परेको प्रमुख जिल्ला अधिकारी दिनेश सागर भुसालले निकालेको विज्ञप्तिमा उल्लेख छ ।
अचानक कर्फ्यू लगाइएका वीरगञ्ज हुँदै विभिन्न स्थानमा जाने यात्रुहरु र आम सर्वसाधारण भने मर्कामा परेका छन् ।
Discussion about this post