अस्पतालजन्य फोहोर व्यवस्थापनः काठमाडौँ महानगरपालिका र मनमोहन मेडिकल कलेजबिच सहकार्य हुने

काठमाडौँ,

स्वास्थ्य संस्थाबाट उत्पादन हुने हानीकारक फोहोरलाई सामान्य फोहोरमा रुपान्तरण गर्न काठमाडौँ महानगरपालिकाले प्रयास थालेको छ । त्यसका लागि उसले मनमोहन मेमोरियल मेडिकल कलेजसँग सहकार्य गर्ने भएको छ ।

मंगलबार महानगरपालिकाकी उपप्रमुख एवं अनुगमन समितिकी संयोजक सुनिता डंगोलको अध्यक्षतामा कलेजका पदाधिकारीसँग बसेको बैठकले, कलेजको जग्गामा एकीकृत प्लान्ट स्थापना गर्ने निर्णय गरेको छ । त्यसका लागि आवश्यक साधन तथा उपकरणका लागि महानगरपालिकाले सहयोग गर्नेछ ।

स्थलगत अवलोकन, डिजाइन र लागत इष्टिमेट तयार गरेपछि सहभागिता र सञ्चालन विधि तयार पारेर सम्झौता हुने महानगरपालिकाले जनाएको छ । बैठकमा उपप्रमुख डंगोलका अनुसार महानगरपालिकाले स्वास्थ्य प्रबर्धन केन्द्र सञ्चालन गरिरहेको छ । यी केन्द्रहरुबाट उत्पादन हुने हानीकारक फोहोर प्रशोधन गर्ने केन्द्रका लागि मनमोहन मेमोरियल मेडिकल कलेजसँग सहकार्य गर्न लागिएको हो । यसलाई नमूना बनाएर स्वास्थ्य संस्थाहरुकै बीचको सहकार्यमा एकीकृत प्रशोधन केन्द्र स्थापना गर्न सकिने उनको धारणा छ ।
स्वास्थ्य संस्थाजन्य फोहोर व्यवस्थापन कार्यको अनुगमन गर्ने क्रममा उनले भनिन् अस्पतालहरुबाट उत्पादन हुने सबै फोहोर हानीकारक हुँदैन । स्रोतमा सुरक्षित वर्गीकरण गरेर जोखिमयुक्त फोहोरलाई जोखिममुक्त बनाउन सबै स्वास्थ्य संस्थाले काम गर्नु पर्ने देखिएको छ । अन्य फोहोरलार्य पुनःप्रयोग र पुनःचक्रिय प्रयोगमा ल्याउन सकिन्छ । यसमा एउटा एकीकृत अभ्यास गरौँ । यसको सफल अभ्यासलाई प्रबर्धन गरौँ ।’

बैठकमा अस्पतालका अध्यक्ष डा.वंशीधर मिश्रले, अस्पताल परिसर स्वयम्भूमा आन्तरिक प्रयोजनका लागि प्रशोधन प्लान्ट स्थापना गर्न लागिएको जानकारी दिए । प्राविधिक रुपमा उपयुक्त भए सोही ठाउँमा, नभए अस्पतालको नाममा रहेको अन्य जमिनमा भएपनि महानगरपालिकासँगको सहकार्यबाट एकीकृत केन्द्र बनाउने उनको भनाई छ ।

महानगरपालिकाको वातावरण व्यवस्थापन विभागले ५० वटा अस्पतालको फोहोर व्यवस्थापन आचरण तथा अभ्यासको अनुगमन गरिसकेको छ । यसमध्ये मिश्रित फोहोर भएका र निर्मलीकरण अभ्यासमा कमी कमजोरी देखिएका २० वटा अस्पतालको फोहोर रोकिएको थियो । यसरी फोहोर रोकिएकामध्ये पनि १८ वटाको पुनःअनुगमन भईसकेको छ ।
अनुगमनका क्रममा टोली मनमोहन अस्पताल पनि पुगेको थियो । अस्पतालले स्थापना गर्न लागेको प्रशोधन प्लान्ट योजनामा सहकार्यको सम्भावना त्यही क्रममा देखिएको थियो ।