काठमाडौंमा ठाउँ तोकेर पाठ्यपुस्तक र पोशाक किन्न बाध्य गर्न नपाइने

काठमाडौं,
काठमाडौँ महानगरपालिकाकाले अभिभावकलाई ठाउँ तोकेर पाठ्य पुस्तक, पोशाक र स्टेशनरी सामाग्री खरिद गर्न बाध्य नपार्न विद्यालयहरुलाई निर्देशन दिएको छ । शिक्षा विभागले विद्यालयहरुलाई परिपत्र गर्दै प्रचलित कानुन विपरीत काम नगर्न सचेत गराएको हो ।

विशेषगरि संस्थागत विद्यालयहरुले पाठ्यपुस्तक, पोशाक तथा स्टेशनरी बिक्री गर्ने ठाउँ तोक्ने र तोकिएको ठाउँमै खरिद गर्न अभिभावकलाई बाध्य पार्दै आएका छन् ।
निमित्त विभागीय प्रमुख सरस्वती पोखरेलले परिपत्र गर्दै विद्यार्थीहरुलाई विद्यालयबाटै वा विद्यालयले तोकेको स्थानबाट पाठ्यपुस्तक, पाठ्य सामाग्री, पोशाक तथा स्टेशनरी लगायत सामाग्री खरिद गर्न बाध्य गर्ने गराउने कार्य नगर्न सचेत गराएकी छन् ।

परिपत्रमा सामुदायिक विद्यालयहरुले पाठ्यक्रम विकास केन्द्रले तयार पारेका पाठ्यपुस्तक मात्र प्रयोग गर्न पाउने, अंग्रेजी माध्यमका पाठ्यपुस्तक प्रयोग गर्नु परेमा केन्द्रले अनुवाद गरेर प्रकाशन गरेका वा सूचीकृत भएका मात्र प्रयोग गर्नुपर्ने, अन्यथा महानगरपालिकाले भुक्तानी नगर्ने चेतावनी दिइएको छ ।

संस्थागत विद्यालयले पनि पाठ्यक्रम विकास केन्द्रले सूचीकृत गरेका पाठ्यसामग्री मात्र प्रयोग गर्न गराउन भनिएको छ ।
विद्यालयहरुले यसविपरीत कार्य (स्वीकृत पाठ्य सामग्री प्रयोग नगरेमा तथा पोसाक, स्टेशनरी लगायतका सामग्रीहरु विद्यालयबाट खरिद गर्न विद्यार्थी तथा अभिभावकहरुलाई बाध्य गराएमा शिक्षा ऐन, २०२८, शिक्षा नियमावली २०५९ तथा काठमाडौं महानगरपालिका शिक्षा ऐन २०७५, नियमावली २०७४ तथा प्रचलित कानुन बमोजिम कारबाही गरिने परिपत्रमा उल्लेख छ ।