राजनीतिक दलमा आबद्ध शिक्षकलाई कारवाही गर्ने तयारी

काठमाडौं
शिक्षा, विज्ञान तथा प्रविधि मन्त्रालयले राजनीतिक दलमा आबद्ध शिक्षक, प्राध्यापक तथा कर्मचारीहरूलाई कारवाही गर्ने तयारी गरेको छ । त्यसका लागि शिक्षा, विज्ञान तथा प्रविधि मन्त्री सुमना श्रेष्ठ र प्रमुख निर्वाचन आयुक्त दिनेश कुमार थपलियाबीच मंगलबार छलफल भएको छ ।

शिक्षकहरूले राजनीतिक दलको सदस्यता लिएको, सक्रिय राजनीति गरेको विषयमा उजुरी परेको मन्त्रालयले जनाएको छ । प्रचलित कानूनले शिक्षकलाई राजनीति गर्नबाट बन्देज गरेको छ । कानून कार्यान्वयनमा लैजाने विषयमा छलफल शिक्षा मन्त्री श्रेष्ठ र प्रमुख निर्वाचन आयुक्त थपलियाबीच छलफल भएको हो ।

छलफलमा शिक्षा मन्त्री श्रेष्ठले राजनीति गरिरहेका शिक्षक पहिचान गर्नमा निर्वाचन आयोगबाट सहयोग माग गरेकी छन् । ‘शिक्षा क्षेत्रबाट दलीय राजनीति हटाउने विषयमा त आम सहमति जस्तै भइसकेको छ । अब, कसरी हटाउने ? भन्ने विषयमा हामीले छलफल गरिरहेका छौँ । प्रमाण जुटाउन आवश्यक विवरण निर्वाचन आयोगबाट प्राप्त हुने अपेक्षा गरिएको छ ।’ मन्त्री श्रेष्ठले भनिन् ।

प्रमुख आयुक्त थपलियाले विद्यमान कानून, विगतमा अदालतबाट भएका फैसला र अन्तर्राष्ट्रिय अभ्यास समेत हेरेर दलमा आबद्ध शिक्षक र कर्मचारीलाई कारवाही गर्न कुनै समस्या नरहेको बताए । ‘विगतमा आयोगले निर्णय नै गरेको छ । कानून कार्यान्वयन गराउन सहयोग गर्छौ ।’ प्रमुख आयुक्त थपलियाले भने ।