दलित युवती भन्छिन : बलात्कारमा परें, प्रहरी जाहेरी दर्ता गर्दैन

आफूले नमान्दा नमान्दै जर्बजस्ती शारीरिक सम्बन्ध राखेको, कुटपीट गरेर भागेको, प्रहरीमा उजुरी गरे नग्न तस्वीर र भिडियो सार्वजनिक गर्ने धम्की दिएको आरोप युवतीको छ । युवती र उनका बुवा माधव विरुद्ध जर्बजस्ती करणीको उजुरी दिन प्रहरी कार्यालयमा धाईरहेका छन् । तर प्रहरीले जाहेरी दर्ता गरिरहेको छैन ।

सुरेश बिडारी

दुई वर्षअघि टिकटक मार्फत वीरगञ्ज बस्ने २२ वर्षीया युवतीको चिनजान माधव पासवानसँग भयो । युवतीका अनुसार माधव पर्साको बहुदरमाई नगरपालिका –४ का बासिन्दा हुन् । त्यसबखत उनी वैदेशिक रोजगारीका क्रममा दुबईमा थिए ।

कुराकानी बढ्दै जाँदा उनीहरुबीच माया बस्यो । वैदेशिक रोजगारीबाट फर्केपछि माधवले उनलाई भेटे । आफूले नमान्दा नमान्दै जर्बजस्ती शारीरिक सम्बन्ध राखेको, कुटपीट गरेर भागेको, प्रहरीमा उजुरी गरे नग्न तस्वीर र भिडियो सार्वजनिक गर्ने धम्की दिएको आरोप युवतीको छ । युवती र उनका बुवा माधव विरुद्ध जर्बजस्ती करणीको उजुरी दिन प्रहरी कार्यालयमा धाईरहेका छन् । तर प्रहरीले जाहेरी दर्ता गरिरहेको छैन ।

कसरी घट्यो घटना ?

युवतीका अनुसार टिकटक पछि उनीहरुबीच ह्वाट्सअप र इमोमा कुराकानी हुन थाल्यो । एक अर्कासँग खुलेर कुराकानी गर्न थाले । झन् नजिकए । माधव नेपाल फर्किएलगत्तै तिमीसँग विवाह गर्छु भन्थे । उनी माधवलाई विश्वास गर्थिन् ।
०८१ वैशाख १३ गते माधव गाउँ आईपुगे । बैशाख १४ गते माधव र युवतीको भेट गाउँ नजिकैको नहरमा भयो । वैशाख १८ गते माधवले युवतीलाई गाउँ नजिकैको मठमा भेट्न बोलाए । भेटपछि उनीहरुबीच भागेर विवाह गर्नेबारे पनि कुरा भयो । माधवले साइकलमा सुमनालाई बाराको नितनपुर र छातापिपराको बीचमा पर्ने मकैबारीमा लगे ।

‘उसले शारीरिक सम्बन्धको लागि प्रस्ताव राखेको थियो, मैले विवाहपछि मात्रै योसब हुन्छ भनेको थिँए, माधवले जिद्दी गरेर जबर्जस्ती शारीरिक सम्बन्ध राखे ।’ उनी भन्छिन्, ‘ त्यसपछि म रुन थाले । उसले साथीलाई फोन गरेर बोलायो । मलाई मकैबारीमै छाडेर उनीहरू मोटरसाइकलमा त्यहाँबाट भागे ।’

साँझसम्म मकैबारीमै अलपत्र परेको अवस्थामा नितनपुरका एक युवकले घरमा लगेर परिवारसँग राखेको उनको भनाई छ । भोलिपल्ट बिहान ती युवकले आफूलाई वीरगञ्ज बजारसम्म लगिदिएको युवती बताउँछिन् । त्यसपछि उनी जिल्ला प्रहरी कार्यालय पर्साको महिला, बालबालिका तथा जेष्ठ नागरिक शाखामा पुगेकी थिइन् । त्यहाँ उनले आफूसँग भएको घटनाको बारेमा जानकारी गराईन् ।
घटनास्थल बारा जिल्लामा पर्ने भएकाले पर्सा प्रहरीले उनलाई बारा जिल्लाकै प्रहरी कार्यालयमा जान सुझाव दियो ।

वैशाख २० गते माधवविरुद्ध जर्बजस्ती करणीको जाहेरी लिएर युवती र उनका बुवा इलाका प्रहरी कार्यालय सिमरामा पुगे । प्रहरीले उनीहरूको कुरा सुन्यो । तर जाहेरी भने दर्ता गरेन । आरोपित माधवलाई झिकाउन मातहतको प्रहरी चौकीलाई पत्र काट्यो । घटनापछि फरार भएका माधव प्रहरीमा हाजिर भएका छैनन् ।

ईलाका प्रहरी कार्यालय सिमराले सोमबार नै दुवै पक्षलाई छलफलका लागि बोलाएको थियो । केटी पक्ष प्रहरी कार्यालयमा पुग्यो तर केटा पक्षका कोही पनि आएनन् । सोधीखोजी गर्दा केटाले अर्कै केटीसँग रक्सौलको मन्दिरमा गएर विवाह गरिसकेको र उतै लुकेर बसेको पत्ता लागेको केटीको बुवा बताउँछन् ।

‘प्रहरी पञ्चायती छलफल गरेर टुंग्याउनु भन्छ । केटा र केटाको बुवा आईरहेका छैनन्, केटाले अर्को विवाह गरिसकेको छ, पञ्चायती गरेर के गर्ने ? केहि बाटो निक्लने होइन् । केटीको बुवा भन्छन्, ‘पैसा लिएर छोरीको जिन्दगी वर्वाद गरौं ?’

उनका अनुसार पटक पटक आग्रह गर्दा पनि प्रहरीले घटना दर्ता गर्न मानेको छैन । ‘६ पटक प्रहरी कार्यालयमा गईसकें । तर मुद्धा दर्ता गरेका छैनन् ।’ उनले भने ‘

इलाका प्रहरी कार्यालय सिमराका प्रमुख प्रहरी नायब उपरीक्षक चिरञ्जिबी दाहालले ‘केही दिन कुरौं, नभए जाहेरी दर्ता गरौंला भनेर जवाफ फर्काउने गरेको उनको भनाई छ ।

प्रहरी अधिकारी नै चाहान्छन्, व्यवहारिक तरिकाले समाधान होस

प्रहरी नायब उपरीक्षक दाहालले आरोपी माधवको खोजी भईरहेको र घटनाबारे अनुसन्धान भईरहेको बताए ।
दर्ता गर्न समस्या त केहि छैन, यो अगाडिदेखि नै लफडा लफडावाला घटना रहेछ, पछि गएर मिल्लान के गर्लान ? भनेर व्यवहारिक तरिकाले आफैं समाधान गरे भने पछि प्रहरीले यसो गरिदिए भन्लान भनेर रोकेका हौं ।

जाहेरी लिएका छौं, कानून बमोजिम म्याद भित्र दर्ता गर्न सकिहालिन्छ । समाधान भएन भने दर्ता गरिदिने हो ।
युवतीले जर्बजस्ती करणी भनिसकेपछि मिलापत्र गर्ने कुरा हुन्छ र सर ? भन्ने प्रश्नमा उनले भने ‘हामीले मिलापत्र गर्दैनौं, वास्तवमा जजक भन्ने त्यस्तो बुझिएको पनि छैन, सहमतीमै भएको भन्ने बुझिएको छ । विवाह गर्ने शर्त, लब परेको रहेछ, मुद्धा त लाग्छ, सबै कुरा तयारी अवस्थामा छ ।

जजक होइन भन्ने संकेत आएपछि तपाईहरुले मुद्धा दर्ता रोकेको हो ? भन्ने प्रश्नमा ‘कसैले हो भनेको र कसैले होइन भनेको, व्यवहारिक पाटो मात्रै हेरेको ‘उनले बताए ।

स्वास्थ्य परीक्षण रिपोर्ट आईसकेको बताउँदै उनले घटना अनुसन्धानको क्रममा रहेकोले रिपोर्टमा के छ ? नबताउने जानकारी दिए ।