सामाजिक सञ्जाल व्यवस्थित गर्न बलियो पत्रकारिता जरुरी

रसुवा,
पत्रकारिता क्षेत्रका सरोकारवालाले सामाजिक सञ्जालका कारण निम्तिएको समस्या व्यवस्थापन गर्न पत्रकारिता क्षेत्र बलियो हुनुपर्ने बताएका छन् । नेपाल पत्रकार महासंघ रसुवा शाखाले आयोजना गरेको सूचना प्रविधिको विकास सम्बन्धी विचार गोष्ठीमा वक्ताहरुले त्यस्तो बताएका हुन् ।

वरिष्ठ पत्रकार किशोर नेपालले सामाजिक सञ्जाल र सूचना प्रविधिको विकासले पारेको प्रभावलाई जिम्मेवारीपूर्ण ढङ्गले व्यवस्थापन गर्ने माध्यम नै पत्रकारिता भएको बताए । ‘पत्रकारिता जगतले विश्वसनीय सूचना र खोजमूलक समाचारको सम्प्रेषण जति प्रभावकारी बनाउन सक्छ, त्यति नै सूचना प्रविधिको नकारात्मक प्रभाव कम हुँदै जान्छ ।’ उनले भने ।

जिम्मेवारीपूर्ण ढङ्गले सूचना सम्प्रेषण गर्दै पत्रकारले समाज परिवर्तनमा योगदान दिनुपर्ने उनको भनाई छ । सूचना प्रविधिको नकारात्मक असर रोक्न सरकारले सूचनासँग डील गर्ने सामर्थ्य राख्नुपर्नेमा उनले जोड दिए ।

व्यावसायिक पत्रकारिता अध्ययन केन्द्रको कार्यकारी अध्यक्ष रुची श्रेष्ठले सामाजिक सञ्जालले निम्त्याएको समस्या समाधानमा मुख्य भूमिका पत्रकारकै हुने बताइन् । पत्रकारिता क्षेत्रले सामाजिक सञ्जाल प्रयोगमा ध्यान दिनुको साथै यसको बढ्दो प्रभावकारिता आत्मसाथ गर्नुपर्ने, सत्य तथ्य सूचना सम्प्रेषण गरेर गलत र भ्रामक खबर फैलन दिन नहुने उनको तर्क छ ।