महुवनमा रेडक्रस उपशाखाको भवन बन्दै

वीरगञ्ज,  पर्साको सखुवा प्रसौनी गाउँपालिका वार्ड नं ५ महुवन स्थित नेपाल रेडक्रस सोसाइटी महुवन उपशाखाको कार्यलय भवन बन्ने भएको छ । भवनको आईतबार सखुवा प्रसौनी गाउँपालिकाका अध्यक्ष जसवन्त यादवले शिलान्यास गरेका छन् ।

गाउँपालिका अध्यक्ष यादवले मानविय सेवाको काममा अगाडी रहने प्रतिबद्धता जनाए । रेडक्रस उपशाखाको भवन बनेपछि मानवीय सहायताको काममा अझ सहज हुने उनको विश्वास छ । सामाजिक सेवा कार्यमा सक्रिय रहँदै आएको रेडक्रस भवन निर्माण गर्ने जस्तो पुण्य कार्यमा सकेको सहयोग गर्न उनले आग्रह गरे ।

नेपाल रेडक्रस सोसाईटी पर्सा शाखा सदस्य शिवनाथ यादवले संघियता पछि विपद व्यवस्थापन स्थानीय सरकारको जिम्मेवारीमा रहेकोले विपदबाट धनजनको क्षति हुन नदिन आवश्यक तयारी गर्न आग्रह गरे । स्थानीय स्तरमा रक्तदान कार्यक्रमको आयोजना गर्न तथा विपद प्रतिकार्यका लागि भवन उपयोगी हुने बताए । पालिकाले रेडक्रसभवन निर्माण कार्यको अगुवाई गर्नु प्रशंसनीय कार्य भएको उनको भनाई छ ।

भवन निर्माणका लागि सखुवा प्रसौनी गाउँपालिकाले २५ लाख बजेट सहयोग गरेको छ । भूँई तल्लामा दुई वटा कोठा र माथी हल गरेर दुई तले भवन बनाउन लागिएको रेडक्रस उपशाखा महवुनका सभापति जदु साहले जानकारी दिए ।