रचनात्मक र गुणस्तरीय समाचार उत्पादनमा ध्यान दिन काउन्सिलको आग्रह

काठमाडौं, प्रेस काउन्सिल नेपालका अध्यक्ष बालकृष्ण बस्नेतले पत्रकारले रचनात्मक र गुणस्तरीय समाचार उत्पादनमा जोड दिनुपर्ने बताएका छन् । प्रेस काउन्सिल नेपालले सुरु गरेको सञ्चार माध्यमसँग काउन्सिल अभियान अन्तर्गत राष्ट्रिय समाचार समितिका पत्रकारसँगको छलफलमा अध्यक्ष बस्नेतले यस्तो बताएका हुन् ।

उनले गुणस्तरीय समाचारले पत्रकारिताको गरिमा उच्च बनाउनुको साथै समाजमा भ्रमपूर्ण सूचना र अफवाह फैलनबाट रोक्ने बताए । ।
नेपालको एकमात्र सरकारी समाचार एजेन्सी राससका धेरै जसो समाचार सञ्चार माध्यमले खरिद नगरिकन चोर्ने प्रवृत्ति निरुत्साहित गर्न सम्बन्धित सञ्चार माध्यमले पनि अनुगमन संयन्त्र बनाउन सक्ने उनको भनाई छ ।

प्रेस काउन्सिलले नियमित सञ्चार माध्यमको अनुगमन, आचारसंहिताको पालना तथा कपि पेस्टको समस्या निरुत्साहनका लागि काम गरिरहेको जानकारी उनले गराए । पछिल्ला दिनमा काउन्सिलले युट्युब लगायतका सामाजिक सञ्जाल व्यवस्थापनमा समेत काम गरिरहेको अध्यक्ष बस्नेतको भनाई छ ।

राससका अध्यक्ष धर्मेन्द्र झाले समाचारको विषयवस्तु जनमुखी र उत्प्रेरक बनाउन काउन्सिलले विशेष कार्यक्रम ल्याउनुपर्ने बताए । राससका समाचारलाई गुणस्तरीय बनाउन शैलीपुस्तिकाको प्रयोग तथा स्वअनुगमन र स्वनियमन गर्ने गरिएको उनको भनाई छ ।

काउन्सिलका अध्यक्ष बस्नेतले राष्ट्रिय समाचार समितिमा जारी ‘गणतन्त्रका उपलब्धीः समृद्धिका लागि पूर्वाधार’ शीर्षकको फोटो प्रदर्शनीको अवलोकन गरेका थिए । त्यसक्रममा उनले मुलुक विकास र आर्थिक समृद्धिको बाटोमा कसरी अगाडि बढ्दैछ भन्ने कुरा समाचार र तस्बिरका माध्यमबाट आम जनतालाई सुसूचित गर्न सकिने बताए ।