‘वैभव वीरगञ्ज’को परिकल्पना साकार पार्ने अठोट

वीरगञ्ज

वीरञ्ज महानगरपालिकाले ‘वैभव वीरगञ्ज’को परिकल्पना साकार पार्ने गरि नीति तथा कार्यक्रम सार्वजनिक गरेको दावी गरेको छ ।

१५ औँ नगरपरिषदमा सार्वजनिक गरिएको नीति तथा कार्यक्रममा सुन्दर, समुन्नत, समृद्द र वैभवशाली वीरगञ्ज निर्माण गर्ने संकल्प लिईएको छ । वीरगञ्जबसीको चाहाना बमोजिम वीरगञ्जलाई सुन्दर, समुन्नत र समृद्ध बनाउने उल्लेख छ ।

‘वैभव वीरगञ्ज’ को परिकल्पनालाई साकार पार्न वीरगञ्जलाई धार्मीक पर्यटकीय स्थलको रुपमा विकसित गर्दै यहाँको ऐतिहासक तथा मौलिकतालाई ध्यानमा राखि नगरवासीको उत्कट चाहना बमोजिम वीरगञ्जलाई सुन्दर, समुन्नत र समृद्द बनाइनेछ ।’ नीति तथा कार्यक्रममा भनिएको छ  ।

यस्तै आगामी आर्थिक वर्षमा यहाँ रहेका धार्मिक तथा पर्यटकीय स्थलहरु विन्दवासिनीमाई मन्दिर, पिपराको नृसिङ्ग मन्दिर र भुटनदेवी मन्दिर निर्माणको कार्य अगाडी बढाउने तथा अन्य मठ मन्दिरको आवश्यकता अनुसार पुनःनिर्माण र सौन्दर्यकरण गर्ने कार्यलाई निरन्तरता दिने जनाएको छ ।

पर्यटन प्रवर्द्धन आन्तरिक आय बृद्धिका लागि वीरगञ्ज १७ र १९ मा पर्ने कोनियामा रहेको सार्वजनिक जग्गामा आधुनिक हरित पार्क सहितको ताल निर्माण गर्ने,  वीरगञ्ज घण्टाघर नजिकको खाली जग्गामा सार्वजनिक निजी साझेदारि र दातृ निकायसँगको समन्वयमा आधुनिक हरित पार्क निर्माणको कार्यलाई अगाडि बढाउने जस्ता कार्यलाई प्राथमिकता दिएको छ ।

स्वच्छ, सफा, हराभरा र सुन्दर वीरगञ्ज शहरको पहिचान स्थापित गर्दै धार्मिक पर्यटकीय गन्तव्यको रुपमा विकसित गर्ने कार्यमा सघाउने विश्वास लिएको मेयर राजेशमान सिंहले बताए ।

पर्यटन, सरसफाई, वन र वातावरण तर्फ महानगरले सिर्सिया नदीको दायाँबायाँ नक्सा बमोजिमको खोला क्षेत्र छुट्याई दुवै तर्फ सडक निर्माण गर्ने, वृक्षारोपण गरी हरियाली प्रवर्द्धन गर्ने र सिर्सिया हरित करिडोर विकास कार्य अघि बढाउन सबै तहका सरकारसँग सहकार्य गर्ने जनाएको छ ।

तर वीरगञ्ज महानगरले सिर्सिया नदी सफा बनाउने यसअघिको प्रतिबद्धता नै पुरा गर्न नसकेको अवस्था छ । कर्मचारी पठाएर नदीको पानी सफा भएको भन्दै भिडियो बनाउन लगाएर मेयर स्वयंले शेयर गरेको भएपनि नदी सफा नभएको स्थानीय बताउँछन् ।

यो तथ्यलाई नीति तथा कार्यक्रममा पनि स्वीकार गरिएको छ । सिर्सिया नदिलाई प्रदुषणमुक्त बनाउन उधोगहरुबाट निस्कने पानी प्रशोधन गरेर मात्र निकास गर्नुपर्ने व्यवस्थालाई निरन्तरता दिँदै सिर्सिया नदी प्रदुषण गर्ने उद्योगहरुलाई कानुनी कारवाहिको प्रकृयालाई निरन्तरता दिने उल्लेख छ ।

स्वच्छ, सफा, हराभरा र सुन्दर वीरगञ्ज बनाउन महानगरले शुरु गरेको सरसफाई अभियानलाई अझै कडाइका साथ लागु गरि जथाभावी फोहोर फाल्ने र फोहोर गर्ने व्यक्तिलाई जरिवाना तथा अन्य दण्ड सजाय गर्ने कार्यलाई निरन्तरता दिने,  मुख्य सडकमा मात्रै नभई टोलटोल र गल्लीगल्ली सफाई हुने गरि जनशक्ति परिचालन गर्नुका साथै सचेत बनाउने कार्यक्रम संचालन गर्ने र त्यसका लागि आवश्यक जनशक्तिको व्यवस्थापन गर्ने महानगरको नीति छ ।

 वीरगञ्जलाई थप स्वच्छ र सफा बनाउन ‘फोहोर गर्नेले नै सफा गर्दा लाग्ने खर्च’ दिनुपर्ने व्यवस्था लागू गरी फोहोर व्यवस्थापनलाई अझै बढी चुस्त बनाउने, फोहोर व्यवस्थापनको लागि ल्याण्डफिल्ड साइटमा आधुनिक उपकरण जडान गरी वैज्ञानिक तवरबाट संचालन गर्ने व्यवस्था मिलाउने महानगरको लक्ष्य छ ।

पछिल्लो दुई वर्षमा वीरगञ्ज महानगरपालिकाका विभिन्न स्थानमा चरम खानेपानीको समस्या देखिएको छ । खानेपानी समस्या समाधानका लागि महानगरपालिकाले आवश्यक कदम चाल्न नसकेको जनगुनासो छ ।

तर आगामी आर्थिक वर्षको नीति तथा कार्यक्रममा महानगरले खानेपानी समस्यालाई प्राथमिकतामा राखेको छ । खानेपानी समस्या समाधान गर्न सार्वजनिक स्थानमा डिप बोरिङ गर्ने कार्यलाई निरन्तरता दिने, नेपाल खानेपानी संस्थानसँगको सहकार्यमा पाइपलाइन विस्तार गर्ने कार्यलाई तिब्रता दिने, नगरका मुख्य स्थानहरु, सामुदायिक विद्यालय, नारायणी अस्पताल लगायतका ठाउँहरुमा  ‘वाटर एटीएम’ प्रणाली स्थापना गर्ने बताईएको छ ।

त्यसैगरि पानीको श्रोत संरक्षण गर्न महानगरभित्रका पोखरी तथा पुराना ईनार र कुवाको संरक्षण गर्दै मर्मत सम्भार गर्ने, नेपाल खानेपानी संस्थान सँगको सहकार्यमा आर्थिक विपन्न परिवारको पहिचान गरि ४ हजार घरधुरीमा धारा जडान गर्ने महानगरको नीति तथा कार्यक्रममा उल्लेख छ ।

वन विनासका कारण भइरहेको जलवायु परिवर्तनलाई न्यूनिकरण गर्न खाना पकाउन खपत भइरहेको दाउरालाई प्रतिस्थापन गर्न वन क्षेत्र आसपासका विपन्न परिवारलाई निशुल्क ग्याँस सिलिण्डर सहित चुल्हो वितरण गर्ने व्यवस्था मिलाउने महानगरले जनाएको छ ।