काठमाडौं,
काठमाडौँ महानगरपालिकाले नेपाल सरकारले तोकेको पेरोक्साइड र एसिड भ्यालु धेरै भएका खाने तेल बजारबाट फिर्ता लैजान निर्देशन दिएको छ । १३ ब्राण्डका खाने तेलको नमूना परीक्षण गर्दा ४ वटा व्राण्डमा समस्या भेटिएपछि खाने फिर्ता लैजान भनेको हो ।
२०८० पुस २७ गते उत्पादन भएको, पक्वान ब्राण्डको व्याच/लट नं. (S)-2 को रिफाइन सोयाविन आयल एउटा हो । यो श्रीराम रिफाइन्ड आयल प्राडक्ट, मोरङको उत्पादन हो ।
२०८० कार्तिकमा उत्पादन भएको अमृत ब्राण्डको व्याच / लट नं. ११ को रिफाइन सोयाविन आयल र २०२४ अप्रिल महिनामा उत्पादन भएको क्वालिटी व्राण्डको व्याच/लट नं. ०८ को रिफाइन सोयाबिन आयलमा पनि सरकारले तोकेको मापदण्ड नपाइएको हो । यी उत्पादनहरु क्रमशः अन्नपूर्ण भेजिटेवल प्रोडक्ट प्रा. लि., वीरगञ्ज पर्सा र क्वालिटी आयल रिफाइनरी प्रा. लि., कटहरी विराटनगरका हुन् ।
यस्तै २०८० साल माघमा उत्पादन भएको, व्याच/लट नं. १० को फेमिली ब्राण्डको आयातीत तोरीको गेडाबाट स्वदेशमा उत्पादन भएको तोरीको तेलमा पारोक्साइड भ्यालु मापदण्डमा नरहेको पाइएको, कृषि तथा पशुपन्छी विभागका प्रमुख नुरनिधि न्यौपानेले जानकारी दिए । यो शिवशक्ति घ्यू उद्योग जीतपुर, बाराको उत्पादन हो ।
यसरी मापदण्ड विपरीत तेल उत्पादन गर्ने उद्योगलाई २ लाख रुपैयाँका दरले जरिवाना गराइएको उनले बताए । ती तेलका नमुना संकलन गरी परीक्षणका लागि बैशाख ३१ गते ‘राष्ट्रिय खाद्य तथा दाना रिफरेन्स प्रयोगशाला’ बबरमहल पठाइएको थियो ।
प्रयोगशाला परीक्षणपछि तयार गरिएको विश्लेषणात्मक प्रतिवेदनको आधारमा कारबाही गरिएको विभाग प्रमुख न्यौपानको भनाई छ ।
‘‘नतताउँदा नै बढी देखिएका भ्यालु तताएपछि झन् बढ्छ । झन अखाद्य बन्छ ।’’ न्यौपानेको भनाइ छ । उनका अनुसार मापदण्ड नपुगेका तेल ३ दिनभित्र फिर्ता लगी नष्ट गरिएको प्रमाणसहित महानगरपालिकामा उपस्थिति हुन पत्राचार गरिएको छ ।
Discussion about this post