पत्रकारिता पढाउने कलेज एकैछिनमा बन्यो अस्पताल

काठमाडौं ।
त्रिभुवन विश्व विद्यालयको पत्रकारिता तथा आमसञ्चार केन्द्रीय विभाग बल्खु स्थित क्यामेरा भवनमा सञ्चालित छ । क्यामेरा भवनमा प्राध्यापक तथा विद्यार्थीहरु एका बिहानै आउँछन् । अध्ययन अध्यापनमा सहभागी हुन्छन् ।

तर साउन ८ गते मंगलबारको दृश्य बेग्लै थियो । चिकित्सक, नर्स लगायत स्वास्थ्यकर्मीको पोशाक लगाएका केहि मानिस कलेज परिसरमा प्रवेश गरे । साथमा सहयोगीहरु पनि थिए । कलेज परिवारसँग मिलेर उनीहरुले कलेजलाई एकैछिनमा अस्पताल जस्तै बनाएँ । बाहिर बरण्डामा डेबल र कुर्सी लगाए, नाम लेखाउने काउन्टर झै बनाएँ । ब्लडप्रेसर, अक्सिजन, सुगर र तौल परीक्षण गर्ने मेसो मिलाए । पहिलो तलामा जनरल ओपिडी तयार भयो, अनि दोस्रो तलामा गाइनो वार्ड ।

शुरुमा विभाग प्रमुख कुन्दन अर्यालले स्वास्थ्य जाँच गराए । अन्य प्राध्यापक र विद्यार्थीहरु पनि लाइन लागे । धमाधम स्वास्थ्य परीक्षण हुन थाल्यो । तल टिकट बनाउने माथि गएर डाक्टरलाई देखाउने, अनि आफ्नो स्वास्थ्य अवस्थाको बारे छलफल गर्ने ।

चिकित्सकले सोधपुछ पछि कतिपयलाई औषधि सेवन गर्न सल्लाह दिए, कतिपयले खानपानमा ध्यान दिन त कतिपयलाई थप जाँचका लागि आग्रह गरे ।

केन्द्रीय विभागसँगको समन्वयमा सानेपा स्थित स्टार अस्पतालका डाक्टर तथा नर्सहरुको टोलीले प्राध्यापक तथा विभागका अध्ययनरत विद्यार्थीहरुको निःशुल्क स्वास्थ्य परीक्षण गरेका हुन् । अस्पतालका चिकित्सक एवं स्वास्थ्यकर्मीहरुले प्राध्यापक तथा विद्यार्थीहरुलाई कलेजमै आएर रक्तचाप, मधुमेह, गाइनो लगायत स्वास्थ्य सेवा प्रदान गरे । परीक्षण रिपोर्ट हेरेर र व्यक्तिसँग छलफल गरेर आवश्यक परामर्श दिए ।

अस्पतालका चिकित्सक, नर्स लगायत अन्य स्वास्थ्यकर्मी समेतको १० जनाको टोलीले कलेजमा अध्ययनरत विद्यार्थी र अध्यापन गराउने प्राध्यापकहरु समेत गरी ३५ जना भन्दा बढीको स्वास्थ्य परीक्षण गरेको प्रशासकीय अधिकृत एकराज कँडेलले जानकारी दिए ।

विभागीय प्रमुखको जिम्मेवारी सम्हालेसँगै डा. कुन्दन अर्यालको सक्रियता बढेको छ । उनमा पत्रकारिता विभागलाई राम्रो बनाउने हुटहुटी देखिन्छ । त्यसैको एउटा उदाहरण हो, मंगलबारको स्वास्थ्य शिविर । यसअघि उनले विद्यार्थीलाई लगेर राससको फोटो प्रदर्शनी अवलोकन गराएका थिए । विभागको भवन ठूलो भएपनि स्रोत साधनको अभाव रहेकोले योजनाबद्ध ढंगले क्रमशः आवश्यक कामहरु गर्दै जाने उनी बताउँछन् ।

विभागीय प्रमुख डा. अर्यालले शिक्षक विद्यार्थीको स्वास्थ्य प्राथमिक विषय भएकोले स्टार अस्पतालसँगको समन्वयमा निःशुल्क स्वास्थ्य परीक्षण शिविरको आयोजना गरिएको बताए । उनले आगामी दिनमा विभागले विद्यार्थीका लागि अन्य रचनात्मक क्रियाकलाप गर्दै जाने उनको भनाई छ ।

उपप्राध्यापक डा. देवराज अर्यालले स्वास्थ्य शिविरले विद्यार्थीको स्वास्थ्य अवस्थाका बारेमा जानकारी हुने र उपचारका लागि बाटो खुल्ने बताए ।

उपप्रध्यापक डा. घमराज लुईंटेलले अस्पतालहरुको सामाजिक जिम्मेवारी निर्वाह गर्दै पत्रकारिता तथा आमसञ्चार केन्द्रीय विभागका शिक्षक र विद्यार्थीहरुको स्वास्थ्य परीक्षण गरेकोमा प्रशंसा गरे । शिक्षक विद्यार्थीको मानसिक र शारीरिक स्वास्थ्य अवस्था राम्रो भएमात्रै शिक्षा गुणस्तरीय बन्ने उनको भनाई छ । ‘स्वास्थ्य र शिक्षा एक अर्काका परिपूरक हुन् । शिक्षा लिनदिनका लागि शिक्षक र विद्यार्थीको स्वास्थ्य राम्रो हुनुपर्छ ’ उनले भने ।

पत्रकारिता तथा आमसञ्चार केन्द्रीय विभाग स्नातकोत्तर तह तेस्रो समेस्टरमा अध्ययनरत विद्यार्थीले निःशुल्क स्वास्थ्य परीक्षण गराउन पाउँदा खुशी लागेको प्रतिक्रिया दिए । तेस्रो सेमेष्टरमा अध्ययनरत विद्यार्थी इक्छा लिम्बुले विभागमा नै आफ्नो स्वास्थ्य सम्बन्धि समस्याका बारेमा निःशुल्क जानकारी लिन पाउँदा उत्साहित भएको बताइन् ।  अर्का विद्यार्थी महेश पाण्डेले स्टार अस्पतालले विभागमा सञ्चालन गरेको निःशुल्क स्वास्थ्य परीक्षण शिविर लाभदायी बनेको बताए ।