सिकलसेल उपचारका लागि राप्ती स्वास्थ्य विज्ञान प्रतिष्ठानमा छुट्टै वार्ड

काठमाडौं
थारु समुदायको प्रमुख स्वास्थ्य समस्या सिकलसेलको उपचारका लागि दाङको घोराहीस्थित राप्ती स्वास्थ्य विज्ञान प्रतिष्ठानमा छुट्टै वार्ड स्थापना गरिएको छ । आइतबारबाट प्रतिष्ठानमा भर्ना हुनेका लागि १० बेड र दिवा उपचारका लागि ५ बेडसहितको वार्ड स्थापना गरिएको हो ।

स्वास्थ्य तथा जनसंख्या मन्त्री प्रदीप पौडेलले कार्तिक २० गते मन्त्रीस्तरीय निर्णय गर्दै भेरि अस्पताल नेपालगञ्जमा छुट्टै वार्ड स्थापना गर्न लगाएका थिए । थारुबहुल क्षेत्र दाङको घोराहीमासमेत सिकलसेल उपचारका लागि बेग्लै वार्ड स्थापना गरिएको प्रतिष्ठानका उपकुलपति विकास लामिछानेले जानकारी दिए । यसअघि दिउँसो मात्र उपचार गर्ने गरिएकामा भर्नाका लागि पर्याप्त व्यवस्था गरिएकाले अब प्रतिष्ठानबाट उपचार सहज हुने उपकुलपति लामिछानले जानकारी दिए ।

थारु समुदायकै प्रमुख स्वास्थ्य समस्यासँग जुध्नका लागि आवश्यक सबै विकल्प अपनाउनुपर्नेमा मन्त्री पौडेलले जोड दिँदै आएका छन् ।
यससँगै थारु समुदायमा वंशाणुगत समस्याका रुपमा रहेको सिकलसेल उपचारका लागि उनीहरुको बसोबास रहेका प्रमुख क्षेत्रमा छुट्टै वार्ड स्थापनापछि थारु समुदाय हर्षित भएका छन् ।

स्वास्थ्य मन्त्रालयका अनुसार सिकलसेलबाट थारु समुदायका झण्डै १२ प्रतिशत नागरिक प्रभावित छन् ।

औषधी निःशुल्क उपलब्ध गराउने तयारी

स्वास्थ्य मन्त्रालयले सिकलसेलको उपचारका लागि आवश्यक पर्ने औषधि समेत निःशुल्क उपलब्ध गराउने गरि तयारी गरिरहेको छ । स्वास्थ्य मन्त्री पौडेलले सिकलसेलको औषधीसमेत निःशुल्क उपलब्ध गराउने गरी तयारी भैरहेको बताउँदै आएका छन् ।

विपन्न समुदायका नागरिक धेरै प्रभावित भएको सिकलसेलका लागि औषधी नै उपलब्ध गराउने योजनाअन्र्तगत काम भैरहेको उनी बताउँछन् ।हाल लाक्षणिक आधारमा सिकलसेलको उपचार हुँदै आइरहेको छ ।

औषधी वितरण गर्ने स्वास्थ्य मन्त्रालयको योजनालाई समर्थन गर्दै प्रधानमन्त्री केपी शर्मा ओलीले समेत सिकलसेलको औषधी निःशुल्क हुने बताएका थिए ।