गोरखामा साक्षरता तथा बालिका शिक्षा कार्यक्रमको समिक्षा

काठमाडौं

साक्षरता तथा बालिका शिक्षा कार्यक्रमको बार्षिक समिक्षा गरिएको छ । कार्यक्रम अन्र्तगत सन् २०२४ मा भएका कामहरुको बारेमा समिक्षा गरिएको हो ।

रूम टु रिडको आर्थिक तथा प्राविधिक सहयोग, एकिकरण नेपाल गोरखाको व्यवस्थापनमा स्थानीय सरकारहरुसँगको समन्वय र सहकार्यमा गोरखा जिल्लामा साक्षरता तथा बालिका शिक्षा कार्यक्रम सञ्चालनमा छ ।

त्यसअवसरमा सन् २०२४ मा गरिएका कार्यक्रमहरु, त्यसबाट हाँसिल भएका उपलब्धिहरु, असल अभ्यासहरु, सामना गरिएका चुनौतिहरु, समाधानका लागि गरिएका प्रयासहरू र कार्यक्रमको दिगोपनका लागि चालिएका कदमहरुको बारेमा समिक्षा गरिएको थियो ।

कार्यक्रममा सामाजिक परिचालक तथा साक्षरता सहजकर्ताहरुले नमुना प्रदर्शन, गीत, कविताका साथै प्रोजेक्टर मार्फत प्रस्तुती गरेका थिए । कार्यक्रममा बालिका शिक्षा कार्यक्रम अन्र्तगत गोरखाका पालुङटार, गोरखा नगरपालिका र सिरानचोक, भिमसेनथापा गाउँपालिकाका १९ वटा विद्यालयमा जीवन उपयोगी सीप कक्षाहरु तथा सामूहिक मेन्टोरिङ सेसनहरु निरन्तर चलिरहको छ । ती क्रियाकलापहरुबाट १०४५ जना बालिका लाभान्वित भएका छन् ।

अभिभावक कार्यशाला, विश्व वातावरण दिवस, अन्र्तराष्ट्रिय बालिका दिवसमा विभिन्न प्रतियोगिता गरिएका छन् । यसबाट १२० जना बालिका नेतृत्वदायी भूमिकामा देखिएको एकिकरण नेपाल गोरखाका कार्यक्रमका अधिकृत उमेश विश्वकर्माले जानकारी दिए ।

साक्षरता कार्यक्रम अन्र्तगत गोरखाका शहिद लखन, अजिरकोट, बारपाक सुलिकोट, सिरानचोक, भिमसेनथापा, गण्डकी गाउँपालिकाको साथसाथै गोरखा, पालुङटार नगरपालिकाका १५० विद्यालयमा पुस्तकालय स्थापना गरिएका छन् । ती पुस्तकालयबाट एक जना विद्यार्थीले एक बर्षमा औसत ३३ ओटा पुस्तक अध्ययन गरेको पाइएको छ ।

यस वर्ष पुस्तकालय व्यवस्थापन सम्बन्धी ८६ जना, पुस्तकालय गतिविधि सम्बन्धी १२६ जना र नेपाली भाषा शिक्षण सम्बन्धी ३७९ जना शिक्षकहरुले विभिन्न चरणमा तालिम प्राप्त गरेका छन् । थप २० ओटा विद्यालयहरुमा कक्षा ३ मा पनि कार्यक्रमको परीक्षण सुरू गरिएको साक्षरता कार्यक्रम अधिकृत होम बहादुर थापाले बताए ।

एकिकरण नेपाल गोरखाका कार्यकारी निर्देशक हरी देवकोटाले सन् २०२४ मा भएका कार्यले निकै उत्साह थपेको बताए । उनले कायक्रमलाई अझ बढि समुदाय केन्द्रित बनाउँदै लैजानुका साथै अन्य पालिकामा समेत विस्तार गर्न आवश्यक रहेको बताए । उनले त्यसका लागि संस्थाले रणनीतिक योजना तय गरेर अघि बढ्ने उनको भनाई छ ।

रूम टु रिड का बरिष्ठ फिल्ड कार्यक्रम व्यवस्थापक शुशिल तिम्सिनाले सन् २०२४ मा फलदायी काम भएको बताउँदै नयाँ वर्ष २०२५ अझ प्रभावकारी ढंगले काम हुने विश्वास व्यक्त गरे ।

समिक्षा कार्यक्रममा रूम टु रिडको बरिष्ठ फिल्ड कार्यक्रम व्यवस्थापक सुशिल तिम्सिना, अन्य कर्मचारीहरु तथा एकिकरण नेपाल गोरखाको परियोजनामा आबद्ध कमचारीहरु सहभागी थिए । एकिकरण नेपाल गोरखाको अध्यक्ष मिलनसिंह बस्नेतको अध्यक्षतामा समिक्षा कार्यक्रम भएको थियो ।