काठमाडौं
स्वास्थ्य तथा जनसंख्या मन्त्रालयले इजाजत पत्र नवीकरण नगराएका स्वास्थ्य संस्थाहरुलाई नविकरण गराउन आग्रह गर्दै लागि सूचना जारी गरेको छ ।
मन्त्रालयले निजी, सहकारी, गैरसरकारी तथा सामुदायिक अस्पताल र स्वास्थ्य संस्थाहरुका नाममा परिपत्र जारी गर्दै इजाजत पत्र नवीकरण गराएर मात्र सेवा सञ्चालन गर्न आव्हान गरेको हो ।
कतिपय गैरसरकारी तथा सामुदायिकस्तरबाट सञ्चालित स्वास्थ्य संस्थाहरु नवीकरण बीना सञ्चालनमा रहेको उजुरी मन्त्रालयमा परेको छ । इजाजत पत्र नवीकरण नगरेका ती स्वास्थ्य संस्थाहरु मापदण्ड अनुसार समेत नचलेको आरोप छ ।
स्वास्थ्य तथा जनसंख्या मन्त्री प्रदीप पौडेलले स्वास्थ्य संस्थाहरुले मापदण्ड पालना गरेको सुनिश्चित गर्न अधिकारीहरुलाई भनेका थिए ।
जनस्वास्थ्य सेवा नियमावलीमा इजाजतपत्र नलिई स्वास्थ्य सेवा उपलब्ध गराउन नपाइने व्यवस्था छ ।
तर कतिपय स्वास्थ्य संस्थाले इजाजतपत्र नै नलिएको लिएपनि समयमा नविकरण नगरेको उजुरी प्राप्त भएकाले नवीकरणका लागि पत्राचार गरिएको मन्त्रालयका प्रवक्ता डा. प्रकाश बुढाथोकीले जानकारी दिए ।
इजाजत पत्र नवीकरण नगरी सञ्चालनमा रहेका स्वास्थ्य संस्थाको अनुगमन गरी नियमानुसार नभएको पाइएमा कारबाही गर्ने चेतावनी प्रवक्ता बुढाथोकीले दिएका छन् ।
Discussion about this post