काठमाडौं
स्वास्थ्य तथा जनसंख्या मन्त्री प्रदीप पौडेलले विद्यालय पाठ्यक्रममा स्वास्थ्य जनचेतनाका विषय परिमार्जन गर्न अग्रसर देखिएका छन् । उनले यसबारेमा शिक्षा विज्ञान तथा प्रविधि मन्त्री विद्या भट्टराईसँग छलफल गरेका छन् ।
छलफलमा मन्त्री पौडेलले विद्यालय तहमा रहेका स्वास्थ्य सम्बन्धी विषय परिमार्जनका लागि विज्ञ समिति बनाएर काम अघि बढाउन आवश्यक रहेको बताए ।
नसर्ने रोग बढ्दै गएकाले रोकथामका लागि विद्यालय तहबाटै सचेतना जगाउन प्रभावकारी सामाग्री पाठ्यपुस्तकमा समेटनुपर्नेमा जोड दिए । स्तरीय सामग्री तयार पार्न पाठ्यक्रम विकास केन्द्रलाई आवश्यक सहयोगका लागि मन्त्रालय तयार रहेको उनको भनाई छ ।
उनले पाठ्यक्रममा स्वस्थ खानपिन तथा मादक पदार्थविरुद्धका सचेतनामूलक सन्देश राख्न जरुरी देखिएको बताए । मन्त्री पौडेलले विद्यालय तहमा स्वास्थ्य विषय अध्ययन गरेकाको सम्बन्ध उच्च शिक्षामा पनि जोड्नुपर्ने आवश्यकता औंल्याए ।
‘नर्सिङ, पब्लिक हेल्थ वा कुन विषयसँग जोड्न सकिन्छ, त्यसका लागि आवश्यक छलफल, परामर्श गरौं ।’ उनले भने, ‘ निरोधात्मक क्षेत्रमा काम गर्ने जनशक्ति उत्पादनमा विद्यालय शिक्षालाई जोडौं ।’
पाठ्यम परिमार्जन गर्न दुवै मन्त्रालयको संयुक्त समूह बनाउन मन्त्री पौडेलले गरेको प्रस्तावमा मन्त्री भट्टराईले सकारात्मक प्रतिक्रिया दिएकी छन् । ‘आवश्यक विषयमा सहकार्य गरौं,’ उनले भनिन् ।
Discussion about this post