प्रत्यारोपणका लागि आवश्यक सामाग्री सरकारी फार्मेसीमै व्यवस्था गर्न परिपत्र

काठमाडौं
स्वास्थ्य तथा जनसंख्या मन्त्रालयले मुटु, हड्डी लगायत विभिन्न विरामीको प्रत्यारोपण तथा उपचारमा आवश्यक पर्ने सामाग्री तथा औषधि अस्पताल फार्मेसीमै व्यवस्था गर्न परिपत्र गरेको छ ।

निजी व्यवसायीले मनपरी मूल्यमा बिक्री गरिरहेको गुनासो आएपछि स्वास्थ्य तथा जनसंख्या मन्त्रालयले चासो दिएको हो । सरकारी फार्मेसीमा ती सामाग्री उपलब्ध नहुने र मूल्य विवरण समेत सार्वजनिक नहुने हुँदा नागरिकले महँगो मूल्यमा खरिद गर्नु परिरहेको छ । नयाँ आर्थिक वर्षबाट शल्यक्रियापछि आवश्यक पर्ने सामाग्री अस्पतालकै फार्मेसीमा उपलब्ध गराउन स्वास्थ्य मन्त्री प्रदीप पौडेलले निर्देशन दिएका थिए ।

अब अस्पतालमा सबैले देख्ने स्थानमा मूल्य सार्वजनिक गर्नुपर्ने तथा अस्पतालकै फार्मेसीमा उपलब्ध हुने गरी सचिवस्तरीय निर्णय गरेर परिपत्र गरिएको मन्त्रालयका प्रवक्ता डा. प्रकाश बुढाथोकीले जानकारी दिए ।

साथै बिक्रेताहरुलाई बढी मूल्य लिनबाट रोक्न सबै अस्पतालले आर्थिक वर्षमा कुनै रोगको प्रत्यारोपण, शल्यक्रिया तथा उपचारका लागि नयाँ खालको वस्तु आवश्यक परेमा कम्पनी, आधिकारिक विक्रेता तथा मूल्य सार्वजनिक गरेर मात्र बिरामीले प्राप्त गर्ने व्यवस्था मिलाउन समेत मन्त्रालयले पत्राचार गरेको छ ।
मन्त्रालयले बिरामीको गुनासो आउने वातावरण आउन नदिन समेत पत्रमार्फत अस्पतालहरुलाई सचेत गराएको छ ।