‘ढाकछोप पत्रकारिता’ मौंलाउन नदिउँ : काउन्सिल अध्यक्ष बस्नेत

काठमाडौं ।
प्रेस काउन्सिल नेपालका अध्यक्ष बालकृष्ण बस्नेतले सञ्चार माध्यममा खोजमूलक भन्दा ‘ढाकछोप पत्रकारिता’ बढ्दै गएकोमा चिन्ता व्यक्त गरेका छन् । विकृतिका रुपमा रहेको ढाकछोप र बार्गेनिङ पत्रकारिता बढ्न नदिन काउन्सिलले सार्थक पहल गरिरहेको उनको भनाई छ ।
गलत प्रवृत्तिलाई उजागर गर्नुपर्नेमा सञ्चार माध्यमले नै ढाकछोप गरेर भ्रम पैदा गर्नु चिन्ताको विषय भएको उनको धारणा छ । सञ्चार माध्यमले सम्प्रेषण गरेका विषयमाथि फरक अनुसन्धान र खोज गर्नुपर्ने अवस्था आएको उनको तर्क छ । ‘ नयाँ र खोजमूलक सामग्री कम देखिन्छ, बेथितिका कुरा ढाकछोप गर्न कै लागि अनलाइन खुलेको भेटियो ।’ उनले भने , ‘त्यस्ता प्रवृत्ति रोक्नका लागि काउन्सिलले विभिन्न कदम चालिरहेको छ ।’ बिहिबार काउन्सिलमा आयोजित पत्रकार आचारसंहिता अभिमुखीकरण कार्यक्रममा बोल्दै उनले नयाँ दर्ता भएका अनलाइन पत्रिकाले व्यावसायिक पत्रकारिता गर्ने विश्वास व्यक्त गरे। काउन्सिलले अरू मिडियासँगै अहिले युट्युबको सामग्री पनि अध्ययन गरिरहेको छ ।
कार्यक्रममा बोल्दै नेपाल पत्रकार महासङ्घका अध्यक्ष विपुल पोखरेलले पत्रकार कुनै एउटा जाति, धर्म, पार्टीप्रति नभएर सिङ्गो समाजप्रति नै जिम्मेवार हुनुपर्नेमा जोड दिए । काउन्सिलका सदस्य दिपक पाण्डेले सम्पादक नै व्यवस्थापक र व्यवस्थापक सम्पादक हुँदा समस्या हुने बताए । सूचना खोज्ने पत्रकारले नै विज्ञापन खोज्न नहुने उनको भनाई छ ।
कार्यक्रममा काउन्सिलका मुख्य अधिकृत झबिन्द्र भुसाल, वरिष्ठ प्रशासकीय अधिकृत दीपक खनाल तथा ४२ वटा सञ्चार माध्यमका प्रकाशक र सम्पादकको सहभागिता थियो ।