बस र ट्रक ठोक्किंदा चालकसहित तीन जनाको मृत्यु, २७ घाइते

बारामा यात्रुवाहक बस र ट्रक आपसमा ठोक्किंदा तीन जनाको मृत्यु भएको छ भने २७ जना घाइते छन्।

काँकडभिट्टाबाट काठमाडौं जाँदै गरेको बाप्र-०३–००१ख २५८७ नम्बरको बस र हेटौंडाबाट पथलैयातर्फ जाँदै गरेको ना७ख ७३०० नम्बरको ट्रक अमलेखगन्जस्थित तीन नम्बर पुल नजिक आज बिहान आपसमा ठोक्किएका थिए।

जिल्ला प्रहरी कार्यालय, बाराका प्रहरी प्रवक्ता दधिराम न्यौपानेका अनुसार दुर्घटनामा परी ट्रक चालक तनहुँ घर भएका २८ वर्षीय पूर्ण गुरुङ, बस चालक मकवानपुर हेटौंडाका ४० वर्षीय हरिशमशेर सुयाल थापा र अर्का सनाखत हुन नसकेका एक पुरुषको मृत्यु भएको हो। उनीहरूको हेटौंडामा उपचारका क्रममा मृत्यु भएको हो।

घाइतेमध्ये सात जनाको अवस्था गम्भीर रहेकाले उपचारका लागि हेटौंडा तथा चितवन मेडिकल कलेज पठाएको प्रहरीले जनाएको छ। अन्य २० जना सामान्य घाइतेको स्थानीय अस्पतालहरूमा उपचार भइरहेको बताइएको छ। -रासस