सर्वोच्चद्वारा ‘जनयुद्ध’ दिवसमा बिदा दिने सरकारी निर्णय बदर

काठमाडौं

सरकारले गरेको फागुन १ गते ‘जनयुद्ध’ दिवसमा बिदा दिने निर्णय सर्वोच्च अदालतले बदर गरेको छ।

सर्वोच्चका न्यायाधीशद्वय आनन्दमोहन भट्टराई र महेश शर्मा पौडेलको संयुक्त इजलासले फागुन १ मा सार्वजनिक बिदा दिने निर्णय बदर गरेको हो।

सर्वोच्चले भनेको छ, ‘नेपालको संविधानको मूल भावना विपरीत निर्णय गर्ने अधिकार संविधानको धारा ७५ ले मन्त्रिपरिषद्लाई दिएको सम्झन नमिल्ने हुँदा जनयुद्ध दिवसको अवसरमा भनी देशभर सार्वजनिक बिदा दिने नेपाल सरकारको मिति २०७९/१०/२९ को निर्णय र यस वर्ष समेत मिति २०८०/११/१ गते सोही बिदा दिने भन्ने निर्णय तथा नेपाल राजपत्र भाग ५ खण्ड ७२ संख्या ६५ मिति २०७९/१२/२ मा प्रकाशित सूचना एवं सो सन्दर्भमा विभिन्न प्रदेश सरकारबाट भएका निर्णय र सूचनाहरू समेत उत्प्रेषणको आदेशद्वारा बदर गरिएको छ।’

मन्त्रिपरिषद्ले माओवादीले सशस्त्र संघर्ष शुरू गरेको फागुन १ गतेको दिनलाई ‘जनयुद्ध’ दिवसका रूपमा मनाउने र सार्वजनिक बिदा दिने निर्णय गरेको थियो। त्यस विरुद्ध द्वन्द्वपीडित ज्ञानेन्द्रराज आरण र कल्याण बुढाथोकी लगायतले सर्वोच्चमा रिट दायर गरेका थिए।