अर्थमन्त्रीको नजरमा लगानीका लागि चार उत्कृष्ट क्षेत्र :जलविद्युत, पर्यटन, कृषि र सूचना प्रविधि

काठमाडौं ।

अर्थमन्त्री डा. प्रकाशशरण महतले नेपालमा लगानीका लागि चार क्षेत्र उत्कृष्ट रहेको बताएका छन् । सोमबार आयोजित नेपाल–भारत संयुक्त बिजनेस फोरमलाई सम्बोधन गर्दै अर्थमन्त्री डा. महतले नेपालमा लगानीका सम्भाव्य विभिन्न क्षेत्र मध्ये चार क्षेत्र उत्कृष्ट रहेको बताएका हुन् ।

जलविद्युत, पर्यटन, कृषि र सूचना प्रविधि लगानीका उत्कृष्ट गन्तव्य हुन सक्ने उनले बताए । यी क्षेत्रमा लगानी गर्दा राम्रो प्रतिफल पाइने भए पनि यी क्षेत्रमा मात्रै लगानी गर्न सरकारले प्रोत्साहन नगर्ने उनको भनाई छ ।
‘यसबाहेक शिक्षा र स्वास्थ्य क्षेत्रमा समेत लगानी गर्दा उत्कृष्ट प्रतिफल प्राप्त हुनसक्छ ।’ उनले भने ।
नेपालको ५० प्रतिशतभन्दा धेरै क्षेत्रफल उच्च पहाडी क्षेत्र अन्तर्गत पर्छ भने २० प्रतिशत क्षेत्रफल समथर भूभाग छ । बाँकी क्षेत्र हिमालीय क्षेत्र हो ।
‘जलविधुतमा नेपालले फड्को मारेकोले नै भारतले १० हजार मेगावाट खरिद गर्ने सम्झौता गरेको बताउँदै अर्थमन्त्री महतले अन्य वस्तुहरुको निर्यातमा पनि निजी क्षेत्रले ध्यान दिनुपर्नेमा जोड दिए ।
नेपालमा राजनीतिक व्यवस्था अस्थिर रहेको भनी गलत प्रचार भइरहेको उनको टिप्पणी छ । आगामी दिनमा व्यवसायिक वातावरण थप मजबुत बन्ने दावी गर्दै उनले नेपाल दक्षिण एसियाकै उत्कृष्ट लगानी गन्तव्य बन्न सक्ने बताए ।
सरकारले वैशाखमा लगानी सम्मेलनको आयोजना गर्न लागेको जानकारी गराउँदै उनले लगानीसम्बन्धी सम्पूर्ण कानुन, नीति नियम सुधार गर्ने प्रतिबद्धता समेत जनाए ।
नेपालमा सयौं पर्यटकीय स्थल भएपनि सडकको दुराअवस्थाका कारण पूर्ण उपयोग गर्न नसकिएको मन्त्री डा. महतको भनाई छ । पर्यटकीय स्थललाई सडक सञ्जालले जोड्न सरकारले ध्यान दिने उनले बताए ।
नेपालको निजी क्षेत्र र भारतको निजी क्षेत्रबीच सहकार्य गरेर व्यवसाय तथा लगानी गर्न उनले सुझाव दिए ।