वीरगञ्ज ।
वीरगञ्ज महानगरपालिका नगरसभाको १४ औँ अधिवेशनले चालु आर्थिक वर्षको बजेटमा २५ करोड रुपैयाँ थप गरेको छ । यसका साथै विभिन्न योजना तथा कार्यक्रमहरु परिमार्जन समेत गरेको छ ।
बुधवारदेखि सुरु भएको अधिवेशनको नगरसभाले वार्षिक बजेट तथा कार्यक्रममा परेर पनि कार्यान्वयनमा आउन नसक्ने अवस्थामा रहेका कार्यक्रम परिमार्जन गर्दै बजेट थप गरेको हो ।
अधिवेशनले विनियोजन ऐन २०८० मा समावेश भएका २०८०/०८१ को वार्षिक बजेट ३ अर्ब २१ करोडमा २५ करोड थपेर ३ अर्ब ४६ करोड पुर्याएको हो । अधिवेशनले खानेपानीका लागि महानगरवासीको ४ हजार घरधुरीमा धारा जडानका लागि ८० लाख रुपैयाँ थप छुट्याएको मेयर राजेशमान सिंहले बताए ।
भारतीय दुतावाससँगको सहकार्यमा महानगरका ४ हजार घरधुरीमा धारा जडानका लागि थप बजेट छुट्याएको मेयर सिंहले जनाए । दुतावासको ८० प्रतिशत र महानगरको २० प्रतिशत लगानी हुने गरी धारा जडानको कार्य अघि बढाउन बजेटमै संशोधन गरेर महानगरले भुक्तानी गर्नु पर्ने २० प्रतिशत रकम विनियोजन गरिएको उनले बताए ।
नगरसभामा मेयर सिंहले विभिन्न विधेयकहरु पनि पेश गरेका छन् । वीरगन्ज महानगर सभाको कार्य सञ्चालन विधेयक, संस्कृत्ति तथा सम्पदा संरक्षण एवम् सम्वर्द्धन विधेयक, संघसंस्था दर्ता तथा नियमन सम्बन्धी विधेयक सभामा पेश गरिएको हो ।
बस्ती विकास शहरी योजना तथा भवन निर्माण मापदण्ड तथा भवन निर्माण इजाजत सम्बन्धी कार्यविधि २०७५ तेस्रो संशोधन, वातावरण तथा प्राकृत्तिक स्रोत संरक्षण संशोधन विधेयकपनि पेश भएको छ । आवश्यक कानुन अभावमा काम गर्न असहज भएकाले सभामा विधेयक पेस गरेको प्रमुख प्रशासकीय अधिकृत मातृका भट्टराईले बताए ।
सं नोट : ekantipur.com का लागि पत्रकार भूषण यादवले लेखेको समाचार साभार गरिएको हो ।
Discussion about this post