थानकोट–चित्लाङ सडक स्तरोन्नतीका लागि बजेट छुट्याउन माग

चित्लाङ
पुस २८ गते शनिवार काठमाडौंबाट थानकोट चन्द्रागिरी हुँदै चित्लाङ जाँदै गरेको प्र ३–०१–२३ च ६९८५ नम्बरको जिप अनियन्त्रित भई सडकबाट करिब ५ सय मिटर तल खस्यो । सेतो पहरामा भएको दुर्घटनामा परी चार जनाको घटनास्थलमै मृत्यु भयो ।
काठमाडौं मैतीदेवीका ६७ वर्षीय ओमकारनिधि तिवारी र ६४ वर्षीया कल्पना तिवारी तथा लाजिम्पाटका डा.महेशकुमार गौतम र चार वर्षीय प्रियान्स गौतमको मृत्यु भएको हो । दुर्घटनामा घाइते भएकी ६ वर्षीया स्मारिका गौतमको उपचार क्रममा बयोधा अस्पतालमा मृत्यु भयो भने कार दुर्घटनामा पर्नु अघि नै झरेका कारण डा. सृष्टि तिवारी गौतम मात्र सकुशल रहिन् । परिवारका सबै सदस्य गुमाएर एक्लै परेकी सृष्टि भाव विव्हल छिन् ।

यो घटनापछि थानकोट चित्लाङ सडक खण्डको दुरा अवस्थाबारे चिन्ता र चासो शुरु भएको छ । सरकारले उदासिनता देखाएका कारण सडक धराप बनेर बसेको स्थानीय बासिन्दाको आरोप छ ।

यसैक्रममा सरोकारवालाको एक टोलीले प्रधानमन्त्री पुष्पकमल दहाल ‘प्रचण्ड’लाई भेटेर सडकका लागि बजेट विनियोजन गरिदिन आग्रह गरेको छ । चालु आर्थिक वर्षमा १० करोड बजेट दिन र ४० करोडको स्रोत सुनिश्चित गरिदिन टोलीले प्रधानमन्त्री प्रचण्डलाई आग्रह गरेको हो ।मकवानपुर–२ बाट निर्वाचित सांसद महेश वर्तोला, पूर्व सांसदहरु रामनारायण बिडारी, सुभाष चन्द्र ठकुरी, नेपाली काँग्रेसका नेता जयराम लामिछाने, थाहा नगरपालिका मेयर बिष्णु बिष्ट ‘आदर्श’, इन्द्रसरोवर गाउँपालिका अध्यक्ष देवकृष्ण पुडासैनी, थाहा ९ का वडा अध्यक्ष राजकुमार बलामी, नेकपा एमाले थाहाका सचीव रामकृष्ण बस्नेत लगायतको टोलीले प्रधानमन्त्री पुष्पकमल दाहाल ‘प्रचण्ड’लाई भेटेका हुन् ।प्रधानमन्त्री प्रचण्डले थानकोट–चित्लाङ सडकको बारेमा जानकार रहेको बताउँदै सरकारले आवश्यक बजेट उपलव्ध गराउने आश्वासन दिनुभएको सांसद बर्तौलाको स्वकीय आशिष अस्लामीले जानकारी दिए ।