वीरगञ्ज
वीरगञ्ज महानगरपालिकाले वडा नं. २३ सबैठवामा स्वास्थ्य प्रयोगशाला निर्माण गर्ने भएको छ । चालु आर्थिक वर्ष २०८०/८१ मा निर्माण कार्य सम्पन्न गर्नेगरि प्रयोगशाला भवनको शिलान्यास गरिएको हो ।
सामान्य प्रयोगशाला जाँचका लागि समेत बजार क्षेत्रका प्रयोगशाला धाइरहनुपर्ने बाध्यता हटाउँदै नागरिकलाई गाउँघरमै सेवा प्रदान गर्ने उद्देश्यले प्रयोगशाला स्थापना गर्न लागिएको वीरगञ्ज महानगरपालिकाले जनाएको छ ।
प्रयोगशाला भवनको सोमबार पूर्व वन मन्त्री एवं पर्सा क्षेत्र नं. १ का सांसद प्रदीप यादव र महानगरका मेयर राजेशमान सिंहले संयुक्त रुपमा शिलान्यास गरे ।
भवन शिलान्यास पछि बोल्दै पूर्व वन मन्त्री यादवले महानगरको ग्रामीण क्षेत्रका नागरिकले अब घरदैलोमै गुणस्तरीय स्वास्थ्य सेवा प्राप्त गर्ने वातावरण बन्न लागेको बताए ।
मेयर सिंहले ग्रामिण क्षेत्रका नागरिकलाई सहज स्वास्थ्य सेवा प्रदान गर्न प्रयोगशाला महत्वपूर्ण हुने बताए । उनले तोकिएको समयमै गुणस्तरीय काम सम्पन्न गर्न ठेकेदार कम्पनीलाई निर्देशन समेत दिए ।
मूल्य अभिवृद्धि कर समेत ६६ लाख ५१ हजार ५ सय ३७ रुपैयाँमा प्रशोगशाला भवन बनाउन स्यारन बिजी कन्सट्रक्सन प्रा.ली.ले ठेक्का सकार गरेको छ ।
Discussion about this post