रुपेश हत्या प्रकरण : प्रहरीले थप पिडा दिएका परिवारजनको गुनासो

वीरगञ्ज । कात्तिक १३ गते सोमबार दिउँसो १२ः५५ बजे कलैयामा गुड्डु भनिने ३५ वर्षीय रुपेश स्वर्णकारको गोली हानी हत्या भयो । कलैया–६ मदरसा टोल बस्ने उनी एकता बोर्डिङ स्कुलका प्रधानाध्यापक थिए ।
घटनाबारे जानकारी पाए लगत्तै प्रहरीले अनुसन्धान शुरु ग¥यो । हत्याको विरोधमा कलैयामा प्रदर्शन समेत भएको थियो ।

कात्तिक १५ गते बुधबार जिल्ला प्रहरी कार्यालय बाराले पत्रकार सम्मेलन गरेर घटनामा संलग्न भएको भनी ५ जनाको नाम सावर्जनिक गरेको छ । प्रहरीका अनुसार हालसम्म भारत बिहार मोतिहारी जिल्ला पूर्वी चम्पारण घोडासहन बहार्वाकालाका २३ वर्षीय अभिनव कुमार राजपुत, जागिराकोटी बस्ने २३ वर्षीय चन्दन कुमार र बारा कलैया–९ रामपुर बस्ने २६ वर्षीय रियाज अन्सारी तथा कलैया– ६ मदरसा टोलमै बस्ने ३४ वर्षीय जामिल अख्तर तथा पे्रमिका भनिएकी २२ वर्षीया राधा गुप्ता घटनामा संलग्न देखिएका छन् । रियाज र जामिल रुपेशकै बोर्डिङमा कार्यरत छन् भने राधालाई ७ महिना अघि बोर्डिङबाट निकालिएको थियो ।

प्रहरी उपरीक्षक सुरेश कुमार काफ्लेले पक्राउ परेकाहरु मध्ये राधा मुख्य योजनाकार रहेको र अन्य सहयोगी मात्रै रहेको बताए । सुटर, मोटरसाईकल चालक लगायत अन्य सहयोगीहरु फरार छन् । विवाहपछि परस्त्रिसँगको प्रेम सम्बन्धका कारण भएको रिसईबीले रुपेशको हत्या भएको प्रहरीको प्रारम्भिक निष्कर्ष छ । साथै विवाद मिलाउन तीन पटक छलफल भएको प्रहरी उपरीक्षक काफ्लेको दावी छ ।

‘हालसम्मको अनुसन्धानमा राधा गुप्ता विगत ३ वर्षदेखि भारत बस्ने मनोज गुप्तासँग (विवाहित) प्रेम सम्बन्धमा रहेको र सोही विषयमा मनोज र रुपेशबीच विवाद र झै–झगडा भएको देखिएको छ ।’ प्रहरी उपरीक्षक काफ्लेले भने ‘ राधा र मनोजको मिलेमतोमा घटना भएको हो, थप कुरा अर्को पटक पत्रकार सम्मेलन गरेर सार्वजनिक गर्छौ ।’
वान्टेड लिष्टमा रहेका व्यक्तिहरु नै सुटर र सहयोगी

प्रहरीले पत्रकार सम्मेलनमा गोली प्रहार गर्ने व्यक्तिहरु भनेर थप चार जनाको नाम सार्वजनिक गरेको छ । भारतको मोतिहारी जिल्ला, दर्पा थाना–१, सुक्लहिया बस्ने २५ वर्षीय सुजित कुमार सिंह, २४ वर्षीय चन्चल पाण्डे, २२ वर्षीय मनिष कुमार सहनी र २० वर्षीय कामेश्वर सहनीले गोली प्रहार गरेको दावी प्रहरीको छ ।
उनीहरु गत असोज ९ गते पचरौता नगरपालिका सुक्लहियाकै २२ वर्षीय सुजित कुमार सिंहको हत्यामा संलग्न भई फरार रहेका अभियुक्त हुन् । यसले एक महिनामा दुईवटा जघन्य हत्याको घटना एउटै समूहबाट हुँदा समेत प्रहरीले उनीहरुलाई पक्राउ गर्न असफल भएको देखिएको छ ।

मृतकका परिवारजन भन्छन् : प्रहरी प्रशासनबाटै चरित्र हत्या गर्ने काम भयो ।

रुपेशको हत्या हुुनुको मुख्य कारण राधासँगको प्रेम सम्बन्ध भनेर सार्वजनिक गरेकोप्रति परिवारजनले भने आपती जनाएका छन् । प्रहरीको गतिविधिले पिडामाथि थप पिडा दिईरहेको उनीहरुको प्रतिक्रिया छ ।
कलैया स्थित निवासमा सञ्चारकर्मीहरुसंग कुरा गर्दै परिवारजनले प्रहरीले मृतकको चरित्र हत्या गरिरहेको गुनासो गरे ।
मृतक रुपेशका दाई भोला सर्राफले प्रहरी अनुसन्धान चित्तबुझ्दो नदेखिएको बताए । ‘ राधासँग जुन सम्बन्ध थियो भनिएको छ, त्यो सरासर गलत हो । ’ उनले भने ‘ प्रहरी अनुसन्धान चित्तबुझ्दो छैन ।’

रुपेशका परिवारले अहिलेसम्म प्रहरीमा किटानी जाहेरी समेत दिएका छैनन् ।

मृतकका अर्का दाई एवं बोर्डिङ स्कुलका व्यवस्थापक सुमोध कुमार सर्राफले प्रहरीले परिवारमाथि थप पिडा दिईरहेको बताए । ‘ राधाको गतिविधि संकास्पद लागेपछि ७ महिना अघि नै बोर्डिङबाट निकालिएको हो । उनीसँग नाम जोडेर रुपेशको बदनाम गर्ने काम भईरहेको छ । यसले परिवारलाई थप पिडा दिएको छ ।’ उनले भने ‘ अरु पनि छोरा भाईजस्ता मानिसहरुलाई पक्राउ गरेर प्रहरीले दोषी देखाईरहेको छ ।’

प्रोपोगाण्डा गरेर घटनालाई मोड्ने काम गरेको भन्दै उनले प्रहरी प्रशासन विरुद्ध कडा आन्दोलन गर्न पनि पछि नपर्ने चेतावनी दिए । बाल एकता बोर्डिङ स्कुलमा कार्यरत रियाज र जामिल निर्दोष रहेको सुमोधको भनाई छ ।

उनले साँझ प्रेस विज्ञप्ती निकालेर प्रहरी प्रशासनको गतिविधिले न्याय पाउने आशा मरेको भन्दै न्यायका लागि आवाज उठाईदिन सरोकारवालासँग आग्रह गरेका छन् । विज्ञप्तीमा दोषि नउम्कुन निर्दोष नफसुन भन्दै घटनाबारे सत्यतथ्य सार्वजनिक गर्न माग गरिएको छ । मृतकका परिवारजनले ८ वटा बुँदा स्पष्ट पारिदिन प्रहरी प्रशासनसँग अनुरोध समेत गरेका छन् ।

• परिवारजनले पचरौता नगरपालिकामा घटेको घटनामा संलग्न व्यक्तिहरुको नाम तथा मोटरसाईकललाई यो घटनासँग जोडी सत्यलाई ढाकछोप गरि घटनालाई अन्यत्र मोड्न खोजेको
• दिनदहाडै भएको हत्याबाट उत्पन्न हुन सक्ने अवस्था तथा सुरक्षा चुनौतीलाई थेग्न नसक्ने अवस्थाबाट मुक्ती पाउन मुद्दालाई अन्यत्र मोड्ने प्रयास भएको
  प्रमाण बिना मृतकको चरित्र हत्या गरेको
• हामीलाई ‘लासको खेल गरे सबैकुरा सार्वजनिक गर्छु ’ भनेर दाह संस्कार गर्न दबाब दिएको तर जिल्ला प्रहरी कार्यालयद्वारा गरिएको पत्रकार सम्मेलनमा चित बुझ्दो प्रमाण दिन नसकेको
• मृतकलाई अस्पताल पु¥याउने विद्यालयका कर्मचारी रियाज अंसारी तथा घटना स्थलमा हुँदै नभएका विद्यालयकै अर्का कर्मचारी जामिल अख्तर अंसारीलाई बिना प्रमाण सहयोगीको आरोप लगाई फसाउन खोजेको
• शान्ति सुरक्षा कायम गर्न नसकेको प्रश्न प्रहरी प्रशासन माथि उब्जने बाटोबाट बच्न आम जनताका आँखामा भ्रम सृजना गर्न खोजेको
• प्रमुख जिल्ला अधिकारी र जिल्ला प्रहरी कार्यालयको अभिव्यक्तिमा भिन्नता देखिएको
• जिल्ला प्रहरी कार्यालय दोषीहरुको दोषलाई उजागार गर्न नसकेको ।