न्यायाधिशको टेबलमा सिन्दुर र मुकुट राखेपछि भयो हङ्गामा

काठमाडौं,

उच्च अदालत जनकपुर, अस्थायी इजलास वीरगञ्जमा बुधबार एउटा अचम्मको घटना घट्यो । १ नं इजलास बस्नु अघि नै एक अपरिचित महिला इजलास छिर्न सफल भइन् , न्यायाधिशको टेबलमा सिन्दुर र मुकुट राखेर गइन् ।  उनको त्यो हर्कतले इजलासको सेवा प्रभावित भयो । सुरक्षाकर्मीकै सामुन्नेबाट अदालत भित्र पसेर बाहिर निस्केकी उनको खोजी प्रहरीले गरिरहेको छ ।

उच्च अदालत अदालतका सूचना अधिकारी सम्मी कपुर साहका अनुसार अदालतका न्यायधिशहरु र कर्मचारीहरु पेशी तोक्नका लागि गोला प्रथा गर्ने कार्यमा व्यस्त रहेको समयमा घटना घटेको बताउँछन् ।

‘ माननीय ज्यूहरु गोला प्रथा गराउनमा व्यस्त हुनुहुन्थ्यो, हामी कर्मचारी प्राविधिक काममा सघाउँछौं ।’उनले भने, ‘ सिसिटिभी क्यामेरामा हेर्दा ८-४० बजे नै ती महिला सुरक्षाकर्मीको आँखा छलेर अदालत परिसर भित्र पसेकी थिइन् ।’ घटना पौने ९ बजेतिर घटेको अनुमान गरिएको छ ।

अदालत प्रवेश गर्नुअघि सुरक्षाकर्मीले गेटमै चेकजाँच गर्ने गर्छन, प्रवेश गर्नुको कारण समेत उल्लेख गरेर रजिष्ट्ररमा नाम लेख्नुपर्ने हुन्छ, पछिल्लो समयमा अनावश्यक भिड आउन नदिन प्रवेश पास समेत लिनुपर्ने व्यवस्था गरिएको छ । तर उनको हर्कतले अदालतको काम कारबाही करिब डेढ घण्टा प्रभावित भएको छ ।

प्रहरी बोलाएर घटनाबारे अनुसन्धान सुरु गर्न लगाएपछि अदालतको कामकाज सुरु गरिएको सूचना अधिकारी साह बताउँछन् ।

प्रहरीले भने घटनाबारे जानकारी आएपछि ईलाका प्रहरी कार्यालय श्रीपुरका प्रहरी निरीक्षक नेतृत्वको टोली पठाएको जानकारी दिएको छ । जिल्ला प्रहरी कार्यालय पर्साका प्रहरी नायब उपरीक्षक किशोर लम्सालले श्रीमानले प्रहरी पठाइदिनु भनेपछि प्रहरी निरीक्षक नेतृत्वको टोली पठाएर अनुसन्धान सुरु गरिएको जानकारी दिए ।

‘ एक जना महिला प्रवेश गरेर ती सामान इजलासमा राखेको जस्तो देखिएको छ ।’ उनले भने, ‘ तनाव, उत्तेजना, भडकाउ केहि कारणले घटना घटाएको हुन सक्छ, सिसिटिभी फुटेजको आधारमा उनको खोजी सुरु गरेका छौं ।’
शंकास्पद महिलालाई पक्राउ गरेपछि मात्रै घटनाबारे थप कुरा खुल्ने उनको भनाई छ ।

प्रारम्भिक सूचनामा इजलास कक्षमा अबिर अक्षता छरेका भन्ने जानकारी आएकोमा पछि सिन्दुर र मुकुटको फोटो नै प्राप्त भएपछि सोही अनुसार समाचार शिर्षक परिवर्तन गरिएको छ । भूलभव त्यसो हुन गएकोले पाठकवर्गमा पर्न गएको असुविधाप्रति क्षमा याचना गर्दछौं । सम्पादक